კარგი ქურა შესანიშნავად უნდა ამზადებდეს კერძებს, იყოს უსაფრთხო, პრაქტიკული და ამავდროულად ამშვენებდეს სამზარეულოს  ინტერიერს.

ცალკე მდგომი ქურა ძირითადად სამი ტიპისაა:

მთლიანად გაზის

 მთლიანად ელექტრო

 კომბინირებული (გაზი/ელექტრო).

გაზის ქურა

მთლიანად გაზის ქურის შემთხვევაში, როგორც ზედაპირი ასევე ქურის ღუმელიც მუშაობს გაზზე (აირზე). ქურა შეიძლება მუშაობდეს თხევად, ან ბუნებრივ აირზე (შესაძლებელია შეცვლა).  ღუმელს შეიძლება გააჩნდეს, როგორც ქვედა წვა, ასევე ზედა გრილი, ან მხოლოდ ქვედა წვა. ქურის ღუმელი მხოლოდ ქვედა წვით უფრო ეკონომიურია, მაგრამ თუ გჭირდებათ ზემოდან დაბრაწვის ფუნქცია, მაშინ უნდა შეარჩიოთ ღუმელი, რომელსაც აქვს ასევე ზედა გრილი.

გაზის ქურის ზედაპირი ძირითადად 4-კომფორიანია, რომელთაგან ერთი არის ეკონომიური, რომლის სიმძლავრეა დაახლოებით 1 კვტ, ორი სტანდარტული- 1,7-1,9 კვტ. და ერთიც დიდი 3 კვტ. დიდი კომფორა შეიძლება იყოს ორმაგი, ან სამმაგი ალით, ე. წ. ,,Wok" კომფორა, რომლის სიმძლავრე შეიძლება იყოს 3,2-3,6 კვტ. ,,Wok" კომფორას გამოიყენება კერძის სწრაფად მოსამზადებლად, ასევე იდეალურია აღმოსავლური სამზარეულოსთვის, მაგ: ფლავის მოსამზადებლად.

ელექტრო ქურა

მთლიანად ელექტრო ქურის (ზედაპირიც და ღუმელიც ელექტრო) შეძენის შემთხვევაში უნდა გაითვალისწინოთ, რომ ასეთი ტიპის ქურების ჯამური სიმძლავრე მაღალია და საჭიროებს სამზარეულოში მძლავრი სადენის დამონტაჟებას (კვეთა 4 მმ3). ძირითადად, გვხვდება ზედაპირები მინა-კერამიკის გოფრირებული ფირის მსგავსი გამაცხელებელი ელემენტით და ჩვეულებრივი-თუჯის გამაცხელებელი კომფორებით. ელ. ქურები სხვადასხვა დიამეტრის და სიმძლავრისაა. თანამედროვე მოდელებს გააჩნია სიმძლავრის რეგულატორი, რაც მეტია დანაყოფი, მით უფრო ზუსტად შეარჩევთ თქვენთვის სასურველ ტემპერატურას. ქურები თუჯის ელ. კომფორებით უფრო იაფია და უფრო დიდი ხნით ინარჩუნებს ტემპერატურას. მინა-კერამიკის ზედაპირი უფრო ადვილად იწმინდება, უფრო სწრაფად ცხელდება და შეიძლება გააჩნდეს ელ. კომფორები ორმაგი და სამმაგი გაცხელების ზონით (სხვადასხვა დიამეტრის ჭურჭლისათვის). ელექტრო ღუმელები უფრო მრავალფუნქციურია, ვიდრე აირზე მომუშავე და ტემპერატურის რეგულირებაც გაცილებით ადვილია. ელ. ღუმელი შეიძლება იყოს მულტიფუნქციური, ანუ გარდა ქვედა და ზედა გამაცხელებელი ელემენტებისა შეიძლება გააჩნდეს უკანა გამაცხელებელი (ტენი) და ვენტილატორი ცხელი ჰაერის თანაბრად განაწილებისათვის მთელს ღუმელში. ამ შემთხვევაში შესაძლებელია გამოცხობა 2-3 დონეზე ერთდროულად. ასევე არის მოდელები ტაიმერით, სადაც შესაძლებელია მომზადების დროის მითითება და ზოგ შემთხვევაში სტარტის გადავადება.

ორივე ტიპის ქურისათვის კომფორები უნდა შევარჩიოთ ჭურჭლის ძირის დიამეტრის მიხედვით. დაუშვებელია ელ. ქურის დიამეტრი ჭურჭლის ძირის დიამეტრზე მეტი იყოს, წინააღმდეგ შემთხვევაში მალე გამოვა მწყობრიდან. იდეალური ვარიანტია, როდესაც დიამეტრები ერთმანეთს ემთხვევა.

კომბინირებული ქურა

კომბინირებული შეიძლება იყოს როგორც ზედაპირი, ასევე ღუმელი. ზედაპირზე შეიძლება იყოს ელექტრო და გაზის კომფორების კომბინაცია. კომბინირებული ღუმელის შემთხვევაში ძირითადად ქვედა წვა არის გაზის, ხოლო ზედა გრილი-ელექტრო. კომბინირებული ქურები მოსახერხებელია ექსპლუატაციისას, რადგან ენერგიის წყაროდ შეგიძლიათ  გამოიყენოთ აირი ან ელექტრო ენერგია. უფრო ხშირად გვხვდება ქურის ზედაპირი ერთი ელექტრო და სამი გაზის კომფორით, ასევე შეიძლება იყოს ორი ელექტრო და ორი გაზის. კომბინირებულ ღუმელებში ხშირად გვხვდება დამატებითი აქსესუარი შამფური, რომელიც გამოიყენება ხორცის დიდი ნაჭრების, ფრინველის ხორცის, თევზის და სხვა გემრიელი კერძის მოსამზადებლად. დიდი მნიშვნელობა აქვს ასევე ღუმელის შიდა საფარს. ისეთი ბრენდების მოდელებში, როგორიცაა BOSCH, SIEMENS, GORENJE გამოიყენება მაღალი ხარისხის ემალი, რომელის ადვილად იწმინდება, ირეკლავს სითბოს, რომელიც რჩება ღუმელში, ამიტომ ეკონომიურია.

ქურების გაბარიტები და მოცულობა

ქურის სიმაღლე სტანდარტულია და დაახლოებით 85 სმ-ს უდრის, სიგანე ძირითადად 60 და 50 სანტიმეტრია, არსებობს მოდელები 90-100 სმ სიგანით, სიღრმე 60 სმ, იშვიათად 50 სმ. ღუმელი იზომება მოცულობის მიხედვით, მოცულობა შეიძლება იყოს 65 ლიტრი და მეტიც.თანამედროვე ქურის სიმაღლე შეიძლება ვარეგულიროთ რეგულირებადი ფეხების საშუალებით, ხოლო სიგანე უნდა შეარჩიოთ თქვენი სამზარეულოს ფართის და თქვენი სურვილის მიხედვით. განიერ ზედაპირზე უფრო მეტი სხვადასხვა სიმძლავრის კომფორებია და დიდი ზომის ჭურჭლის მოთავსებაა შესაძლებელი. დიდი ზომის ღუმელში შესაბამისად დიდი ლანგრებია მოთავსებული.

 ქურის სამუშაო ზედაპირის მასალა

ქურის არჩევის დროს აუცილებელია ყურადღება  მივაქციოთ, რა მასალისაგან არის დამზადებული ქურის სამუშაო ზედაპირი. არსებობს რამდენიმე გავრცელებული ვარიანტი, რომლებიც განსხვავდებიან ფასით და  ხარისხით. ყველაზე გავრცელებულია  მომინანქრებული (ემალირებული), ლითონის (უჟანგავი ფოლადი, ალუმინის შენადნობი) და მინა-კერამიკის ზედაპირები.

ყველაზე გავრცელებულია მომინანქრებული ზედაპირი. მას გააჩნია მაღალი ჰიგიენური მახასიათებლები, ის ძალიან ადვილი გასაწმენდია. გარდა ამისა  მომინანქრებული ზედაპირი შესაძლებელია იყოს სხვადასხვა ფერის. ხოლო  მისი მინუსი იმაში მდგომარეობს  რომ, უფრო ადვილად ზიანდება ვიდრე სხვა მასალები.

 დამატებითი ფუნქციები:

• თვითწმენდის ფუნქცია. ქურებს ელექტრო ღუმელით შეიძლება ჰქონდეს სხვადასხვა თვითწმენდის ფუნქცია, მათ შორის ერთ-ერთია პიროლიტიკური თვითწმენდა, რომელიც როგორც წესი მაღალი ხარისხის და ძვირადღირებულ ქურების თვისებაა.
• უსაფრთხოების სისტემა. გაზქურის შერჩევისას ყურადღება მიაქციეთ რომ ქურას გააჩნდეს Gas Control-ის ფუნქცია, რომელიც დაიცავს ქურას გაზის გაჟონვისგან. გაჟონვის შემთხვევაში ამ ფუნქციით ავტომატურად გაითიშება გაზის მიწოდება.
• ელექტრო ანთების სისტემა. ელექტრო ანთება შეიძლება იყოს ჩვეულებრივი და ავტომატური. პირველ შემთხვევაში საკმარისია მოვაბრუნოთ კომფორას სიმძლავრის გადამრთველი, ხოლო შემდეგ დავაწვეთ აალების ღილაკს. ავტომატური რეჟიმი უფრო მარტივია, ანთება ხდება პირდაპირ გადამრთველის მობრუნების დროს.
• ქურები ელექტრო ღუმელით უფრო მრავალფუნქციური შეიძლება იყოს, ვიდრე გაზის ღუმელით. მაგ: 3D კონვექციისას შესაძლებელია 2-3 დონეზე ერთდროულად გამოცხობა, ან კიდევ არსებობს ე. წ. პიცის ფუნქცია, ეს არის 3D კონვექციას დამატებული ქვედა გამაცხელებელი ელემენტი, ფუნქცია იდეალურია პიცის მოსამზადებლად.
• სირთულეს არ წარმოადგენს ისეთი ღუმელის გაწმენდა, რომელსაც გააჩნია პიროლიტიკური, ან აქტიური თვითწმენდა. ამ დროს გამოიწვება ღუმელი მაღალ ტემპერატურაზე (480-500 0С), ღუმელის კედლებზე არსებული ცხიმები და ნარჩენები დაიფერფლება და ღუმელი ახალივითაა. კატალიტიკური თვითწმენდის დროს ღუმელის კედელზე, ან კედლებზე მოთავსებულია სპეციალური საფარით დაფარული ფირფიტა, რომელიც შთანთქავს მასზე მოხვედრილ ცხიმს.
• არსებობს ღუმელები კარის ორმაგი თბოიზოლაციით და სამმაგი მინის ფენით. ასეთი კარი გრილია (45-50 0C) მაშინაც კი, როცა ღუმელში ტემპერატურა 200 0C-ს აღწევს.
• გაზის ქურას ექსპლოატაციისას მოხერხებულობას  უმატებს ტელესკოპური მიმართვები. მათი დახმარებით შესაძლებელია ლანგარი იოლად გამოვიღოთ 2/3-ზე მაგ: კერძის მომზადების დონის შემოწმებისას, ისე რომ არ ჩამოგვივარდეს.

თუ თქვენ სტატია წაიკითხეთ თქვენ უკვე მზად ხართ ახალი გაზქურის  შესაძენად ! შეიძინეთ გაზქურები ჩვენთან, საუკეთესო ბრენდები დაბალი ფასითა და მაღალი ხარისხით!

>> გაზქურის  შესაძენად დააჭირეთ ლინკს <<